യുവ നടൻ ഷെയ്ൻ നിഗത്തിനെ നായകനാക്കി നവാഗതനായ വീര സംവിധാനം ചെയ്യുന്ന ഹാൽ എന്ന ചിത്രത്തിന്റെ ചിത്രീകരണം പൂർത്തിയായി. സംഗീതത്തിന് പ്രാധാന്യം നൽകി ഒരുങ്ങിയിരിക്കുന്ന ചിത്രം 90 ദിവസത്തോളമെടുത്താണ് ചിത്രീകരണം പൂർത്തിയാക്കിയത്. ഷെയ്ൻ നിഗത്തിന്റെ കരിയറിലെ ഏറ്റവും ചിലവേറിയ ചിത്രങ്ങളിൽ ഒന്നുകൂടിയാണ് 'ഹാൽ'.
മലബാർ പശ്ചാത്തലത്തിലെത്തുന്ന ഹാലില്‍ സംഗീതവും പ്രണയവും വിഷയമാകുന്നുണ്ട്. കോഴിക്കോട് നഗരത്തിൽ റാപ്പ് മ്യൂസിക്കുമായി ബന്ധപ്പെട്ടു പ്രവർത്തിക്കുന്ന ഒരു ഗ്രൂപ്പിലെ അംഗമായ ആസിഫ് ആയിട്ടാണ് ഷെയ്ൻ നിഗം ചിത്രത്തിൽ എത്തുന്നത്.
സാക്ഷി വൈദ്യയാണ് നായിക. മമ്മൂട്ടിയുടെ ഏജന്റ് എന്ന തെലുങ്കു ചിത്രത്തിലെ നായികയായ വൈദ്യയുടെ ആദ്യ മലയാള ചിത്രം കൂടിയാണ് ഹാല്‍. ജെ വി ജെ പ്രൊഡക്ഷൻസിന്റെ ബാനറിൽ ഒരുങ്ങുന്ന ഹാലിന്റെ രചന നിർവഹിച്ചിരിക്കുന്നത് നിഷാദ് കോയയാണ്. ഓർഡിനറി, മധുര നാരങ്ങ, തോപ്പിൽ ജോപ്പൻ, ശിക്കാരി ശംഭു എന്നീ ചിത്രങ്ങൾക്ക് ശേഷം നിഷാദ് കോയ രചന നിർവഹിക്കുന്ന സിനിമയാണ് ഹാല്‍.
പ്രമുഖ ബോളിവുഡ് ഗായകൻ ആത്തിഫ് അസ്‌ലം ആദ്യമായി ഒരു മലയാള ചിത്രത്തിനായി പാടുന്നു എന്ന പ്രത്യേകത കൂടി ഹാലിനുണ്ട്. ജോണി ആന്റണി, നിഷാന്ത് സാഗർ, മധുപാൽ, ജോയ് മാത്യു, സുരേഷ് കൃഷ്ണ, സംഗീത, മനോജ് കെ.യു, രവീന്ദ്രന്‍, നിയാസ് ബക്കര്‍, നിഷാന്ത് സാഗര്‍, അബിന്‍ വിനോ, റിയാസ് നെടുമങ്ങാട്, വിനീത് വീപ് കുമാര്‍, ദിനേശ് പണിക്കര്‍, മഞ്ജഷ കോലോത്ത്, ശ്രീധന്യ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
ചിത്രത്തിന്റെ ചെറിയ ടീസറും ഒരു ഗാനവും നേരത്തെ പുറത്തിറങ്ങിയിരുന്നു.
മലയാളത്തിന് പുറമെ ഹിന്ദി, തെലുങ്ക്, തമിഴ്, കന്നഡ എന്നീ ഭാഷകളിലായി ഒരേ സമയം റിലീസ് ചെയ്യുന്ന ചിത്രം ഒരു കംപ്ലീറ്റ് എന്റർടെയ്‌നർ ആയിരിക്കുമെന്നാണ് അണിയറ പ്രവര്‍ത്തകര്‍ പറയുന്നത്. നന്ദഗോപൻ വി ആണ് ചിത്രത്തിന്റെ സംഗീതം നിർവഹിച്ചിരിക്കുന്നത്, ക്യാമറ: രവി ചന്ദ്രൻ, ആർട്ട് ഡയറക്ഷൻ: നാഥൻ മണ്ണൂർ, എഡിറ്റർ: ആകാശ്, കോസ്റ്റ്യൂംസ്: ധന്യ ബാലകൃഷ്ണൻ, പ്രൊജക്റ്റ് ഡിസൈനർ: ഷംനാസ് എം അഷ്റഫ്, പ്രൊഡക്ഷൻ കൺട്രോളർ: ജിനു പി.കെ, മേക്കപ്പ്: അമൽ ചന്ദ്രൻ, വിഎഫ്എക്‌സ്: മിൻസ്റ്റീൻ സ്റ്റുഡിയോസ്, ഡിസൈൻസ്: ടെൻ പോയിന്റ്‌സ്, സ്റ്റിൽസ് : എസ് ബി കെ ഷുഹൈബ്, പി ആർ ഒ: വാഴൂർ ജോസ്, ആതിര ദിൽജിത്